Posted by Papa ivvi
on 20/5/2008, 1:38 pm
Tanta Mince so lama suka skali mo pake kalong, mar tiap kali dia minta bli akang pa om Maku, om Maku cuma acuh2 akang. Satu waktu, tanta Mice dapa 'jurus' supaya om Maku bli akang kalong for tanta Mince. Pagi2 abis tanta Mince beking smokol for om Maku, tanta Mice buka cirita; Tanta Mince: "Maku, tadi malam kwa kita da mimpi, torang dua da pigi di kobong pece, kong smentara bajalang di litir, ngana pe kaki soasoa gigi kong ngana so nimbole dapa bajalang. kong kata, waktu torang dua pigi pa dokter, dokter bilang ngana eso somo ferlameng kong somo mampos. waktu kata ngana somo 'brangkat', abis ngana ba pasang pa anak2, ngana kase pake kalong mas pa kita. pe ajaib skali do'e!. waktu itu jo ngana pe saki langsung bae". Tanta Mince cirita depe mimpi pa om Maku. Om Maku trus tarek napas panjang, kong basuara. om Maku: "Mince, apa ngana pe mimpi pe arti kita nintau. mar nanti sore ngana somo tau tu mimpi pe arti kalu apa. skarang ngana strika akang tape baju, kita mo pi mnado skarang, ada kita mo bli for ngana". Tanta Mince pe sanang nya dapa bilang waktu itu. Pe sore kamari, om Maku blum riki buka pintu pagar, tanta Mince trus togor deng mesra. Tanta Mince: "Maku sayang, apa do' tu ngana da bli for kita?" (tanta Mince harap2 om Maku da bli kalong baru). Om Maku trus loku popoji kong kase bungkusan kacili pa tanta mince. Tanta Mince trus polo pa om Maku kong ciong. Mar bagitu tanta Mince buka tu bungkusan, dia langsung bale baveto pa om Maku. "Makuuu!! ngana pe strompong deng nganae!!! ngana mo beking mati deng makang hati pa kita!!" Rupanya kote tu om Maku da pi bli kamari bukang kalong mar buku mimpi.
Message Thread:
« Back to thread