Posted by Papa ivvi on 13/6/2008, 11:13 pm
Suatu hari di atas kapal pesiar,....
Ada satu orang kelasi lari ka anjungan kong kaseau pa kapten kapal..
"Kep, cilaka kep..! kep pe anak.. ciri ka laut..!". tu kelasi pigi melapor pa kapten.
"Pe biongo skali dia..!" kiapa dia balumpa no kapal samantara bajalang..?". "Bukang dia da balumpa kep, maar ada ta palisi kong malintuang ciri ka laut.." Itu kapten langsung suruh stop mesin, kong putar haluan ka arah depe anak da ciri akang. napa tu anak so babataria minta2 tolong kasiang..
Kapten suruh pa mualim; "Chief, ngana balumpa kong pi tarek kamari pa dia..!". "Ado kep, kita nintau ba tobo.,".
"Bos, ngana jo tu balumpa kasana..! kita tau ngana jago ba tobo..". kapten suruh pa bosun.
"Ya noh,.. kita memang tau ba tobo, kep.. maar kita pe kile'kile' ada bisul.. jadi nimbole kase ba gra bebas tu tangan..".
Pe rame skali tu orang di kapal situ, maar nyanda ada satu orang yang brani balumpa pi tolong tu anak. Kage2, 'Byurr..' babunyi suara aer di bawah sana. "Pe brani skali dia.. sapa dia kang..?" kapten ba suara.
Setelah tu anak so dapa tolong, kapten pangge tu da balumpa tadi, rupanya so opa' opa'.
Di muka banya orang, tu kapten kase pengumuman: "Sudara2, kita salut deng ini opa pe keberanian. meskipun dia so tua, maar dia pe keberanian luar biasa. buktinya, nyanda ada orang yang brani balumpa. cuma ni opa ini yang brani. sebagai rasa trimakase, kita mo turuti apa saja ini opa pe permintaan. karna dia so tolong kita pe anak.." kapten stenga ba pidato.
"Opa, apa opa pe permintaan? apa tu opa minta yang penting kita boleh kase, kita kase. opa mo minta doi boleh, minta bli akang oto boleh, mo kamana mana deng ini kapal pun boleh, gratis nyanda bayar..".
Tu opa maju kong basuara; "Nyaku kwa nyanda mo minta rupa deng tu kapten da bilang,.. kapten bilang trimakase jo so cukup,..cuma ada satu yang nyaku mo minta per angko kapten.."
"Apa itu..?" kapten tanya pa opa.
Deng suara serak serak amblas, tu opa bataria;
"TOLONG CARI TAU AKANG KMARI, SAPA TU DA TOLA PER NYAKU..!!".
Message Thread:
« Back to thread