Posted by sosiru on 7/11/2009, 5:13 am
Tanta Yuli deng Om Endy salalu batamang deng dorang pe anak, Meike, waktu basombayang sebelum tidor. Satu malam, Meiske basombayang bagini:
Meiske: "Tolong jaga akang kita pe papa, kita pe mama, deng kita pe oma. Tolong trima kita pe opa"
Om Endy: "Meis, kiapa ngana sombayang bagitu"
Mesike: "Nintau lei, tau2 so tabilang bagitu"
Depe eso, Om Endy pe papa orang dapa so tre di kobong.
Rupa biasa, depe malam berikut, Meike lei basombayang:
Meiske: "Tolong jaga akang kita pe mama, deng kita pe papa. Tolong trima akang kita pe Oma"
Tanta Yuli: "Meis, jang kua sombayang bagitu. Nanti kalu jadi apa-apa lei torang tu bingo"
Meiske: "Kita kua nintau kiapa ta cumu bagitu eh"
Depe eso Tanta Yuli pe mama orang dapa so nyanda banapas di tampa tidor.
Malam ka tiga, Meiske basombayang, maar komang cuma Om Endy tu da batamang.
Meiske: "Tolong jaga akang kita pe Mama. Trima akang kita pe papa"
Pe dengar tu sombayang, Om Endy langsung totofore jaha. Satu malang dia nyanda tidor. Kong depe eso, pagi pagi buta Om Endy so pi kobong sampe jam 12 tenga malam. Bagitu jam 12 lewat 1 menit, Om Endy pulang rumah. Om Endy pikir tu Meiske pe sombayang kote cuma kebetulan.
Pe sampe di rumah, tanta Yuli langsung ba feto:
Tanta Yuli: "Endy, ada ka mana ngana? Apa ngana nintau torang pe birman, Dokter Tony orang da dapa so nyanda ba napas tadi pagi di dia pe tampa praktek?"
Om Endy langsung flao.
O we wei ni Tanta Yuli dang.
Sosiru
Message Thread:
« Back to thread